Të pathënat e 97', ish-deputeti Spartak Braho në 'Frontline': Ngjarje të mbushura me gjak! Berisha përgjegjës, priste të arratisej por ndërhyri OSBE

Ish-deputeti socialist, Spartak Braho tha në 'Frontline' në Report TV, se Berisha tashmë bërë qesharak.

'Ka mbetur si gardelina që cicëron atje në katin e katërt apo pestë. Është bërë qesharak. Janë bërë qesharak edhe ata që venë pas tij. Ka shpurën e tij. Ka bërë ndere edhe ai, ka 5 njerëz.', tha Braho

Nga ana tjetër ai pati kritika për Gjekmarkajn dhe Bardhin që u bashkuan me Rithemelimin.

'Gjekmarkaj pasi tha për ngjarjet e 8 janarit, atje priteshin dhunë dhe vrasje dhe Berishizmi është ideologji komuniste ky e tha Gjekmarkaj. Tani afrohet. Pa bosht.

Bardhi ka turpëruar Kavajën. Është pjesa më e rrezikshme, më hileqare e drejtuesve aktual të Rithemelimit. Ka qëndruar me tre-katër karrige. Është pa personalitet, pa moral edhe gjinor. Pa personalitet edhe politik.', shtoi Braho.

Dënimi i sotëm i Fredi Belerit me dy vite u diskutua ndër të tjera në 'Frontline' në Report TV me ish-deputetin Spartak Braho. Ai u shpreh se Beleri duhej dënuar më shumë edhe për masakrën e Peshkëpisë. 

‘Beleri është dënuar pak dy vjet. Duhet të vuaj edhe krimet e Peshkëpisë. Me masakrën me dy viktima shqiptarë. Pretendon se është amnistuar. Është turpi i Sali Berishës dhe Ilir Metës që kandiduan në Himarë Belerin. Himara është shqiptare. S’mund të drejtoj Mitsotakis me të deleguarit e tij që i përgatit andej. Ai është pjesë e llumit e shërbimeve sekrete greke i përpunuar atje. Nuk është fare minoritar, është me origjinë nga Kurveleshi. Të rrijë urtë. Jo dy vjet por edhe 10 vjet janë pak për të.’, tha Braho.

Për ngjarjet e vitit 1997, ish-deputeti Spartak Braho tha në ‘Frontline’ në Report TV, se ato ndodhën edhe si nxitje nga shërbimet e huaja si ajo greke dhe serbe.

“Armët ranë në duar të ndryshme, të cilët ishin të frikësuar për sulmet që nisën kundër jugut. Kjo klimë qe dhe vepër e nxitjeve të shërbimeve të huaja. Shërbimi grek ka qenë shumë aktiv, shërbimi serb. Kishin linjat e tyre direkte. E ka bërë këtë pohim vetë Gazidede. Kur jo vetëm evidenton punën e shërbimit grek dhe serb por tha kanë qenë nxitje të shërbimit amerikan. Domethënë amerikanizmi i tyre është shumë i hershëm.”, tha Braho.

Nga ana tjetër, Braho shtoi se Berisha priste të arratisej nga momenti në moment por ndërhyri OSBE.

“Ranë të tëra strukturat e shtetit, në presionin e revoltës popullore të gjitha u shthurën. Janë fshehur një pjesë e tyre, një pjesë iku jashtë. Iku ministri i mbrojtjes, familja e Berishës iku fjeti një muaj në Brindisi. Mbeti pa shtet. Presidenti i asaj kohe, Berisha mbeti me 4 muret e zyrës dhe priste nga çasti në çast të arratisej. Por ndodhi një ndërhyrje nga OSBE kur Fino ishte miratuar si kryeministër. Që nuk duhet të iki se do komentohet sikur të majtët e morën pushtetin me dhunë.”, shtoi Braho.

Ish-deputeti i PS-së Spartak Braho në ‘Frontline’ në Report TV, tha se në ngjarjet e vitit 1997 ish-presidenti Berisha tentoi të përplaste jugun me veriun duke dhënë urdhëra për bombardimin e jugut të vendit.

“Berisha tentoi të përplaste veriun me jugun. Strukturat e Shikut në Vlorë vranë një person. Pas vrasjeve në Vlorë atëherë populli rrëmbeu armët. U thyen operacionet. Pastaj u dha urdhëri që të bombardohej jugu me urdhër të Berishës. Gjë të cilën ma ka pohuar gjenerali që drejtonte forcat ajrore. Më tha godit raketa. U godit Tepelena, Saranda, Kurveleshi. Me urdhër direkt dhe me dhjetëra urdhëra të tjera të drejtuesve të shtetit, u armatosën militantët e PD-së.”, tha Braho.